提起強姦呢兩個字，大家一定係諗，犯罪係男，受害係女，政府喺9月推出一份《強姦及其他未經同意下進行的性罪行》諮詢文件，工聯會衞星組織「香港男士協會」就不滿指，諮詢文件假設男性係施暴者，不滿負責諮詢嘅法律改革委員會對男士有「原罪」嘅看法。
男協話，據佢哋了解，德國、法國、台灣等地對強姦一罪嘅定義，都先後改為不論男女，即係話女性一樣可以向男性施暴，要求法改會唔好再歧視男人。佢哋仲話，近年有未成年女童引誘他人與其發生性行為，而女性與未成年男性發生性行為亦不用負上法律責任，對少男不公，故男協要求將「衰十一」條文，擴展至保護未成年少男。