湖人周四舉行記者會，正式介紹球隊第24任教練迪安東尼（右），因為剛完成膝部手術，迪帥仲要靠一對拐杖同傳媒見面同主持首課練習，下周日主場對火箭，預料亦係迪帥首場正式領軍比賽。迪安東尼帶領太陽、紐約人都擅長炮轟戰術，喺記者會上表明，會繼續華麗進攻，但同樣要領湖人贏波。
D佐敦扮放屁惡搞途人
美國好多搞笑電視節目都係玩花臣整蠱途人，今次連快艇中鋒D佐敦都加入埋一份；話說佢袋住個會播放屁聲嘅機，喺加州勝地Venice Beach走埋其他遊人身邊，佢7呎身高加上NBA球員名氣，身邊人士都敢怒而不敢言，想睇吓佢點搞笑，可以上呢度睇吓： http://www.youtube.com/watch?v=0ISC36e8-Dg。
J侯活終於有班落
美國經濟唔好，搞到好多隊都唔多擴軍，好多當打球員目前都自由身，好彩前爵士前鋒J侯活同後衞李維斯頓，都成功脫離失業大軍行列。傷兵極多嘅木狼，就簽入J侯活，仲畀足佢一年約，巫師因為禾爾受傷，就簽李維斯頓返嚟，不過實際合約期就冇講。