今周重點，唔同樓上「刁兄」齊貼英超，主攻英冠，各隊唞夠兼下周中無快車賽期，個人認為原實力分子可抬頭，趁低吸納伯明翰同狼隊，兩支排名下游嘅前英超球會。
今周英超列強要應付下周中嘅歐聯、歐霸，不過有隊波一定唔理得咁多，傾全力拚盡，講緊係表現每下愈況、喺倫敦球會中越排越後嘅阿仙奴，今早場鬥北倫敦死敵熱刺。莊家夠膽開到阿仙奴讓半/一，估計係同日3個開嘅英超讓半/一辣盤中，兩邊押注最平均嘅一場（其餘兩場係車仔及愛華頓分別作客西布朗同雷丁）。
喜歡捉盤路球迷可留意，英超賭盤特色係唔少名氣盛、但不乏讓得太辣太離譜嘅賽事；計對上4輪英超，小弟粗略統計足智彩開了7個半/一盤，結果唯一食成個係西布朗贏修咸頓2:0，連曼聯狂攻阿仙奴都只係贏2:1食半格及曼城險勝西布朗贏半格。另外4個上盤中伏，包括車仔讓唔起史雲斯同利記、曼城作客和韋斯咸。最笑料，昆士柏讓雷丁半/一，開和局。
今天，到近期盤路極差嘅阿仙奴被莊家例開半/一，相信唔會吸到太多票數；個人博衰波反底多喜攻波膽，但想博讓球盤之賭友，可信國際賽後早場主隊效應、可信熱刺近況亦劣已錄連敗及中場用上侯度史東及辛度雲尼亞里創造力大減，靠晒加里夫巴利。更可信係主隊若出番施捷斯尼會安心得多。上季熱刺作客喺領先兩球下反輸阿仙奴5:2，今次國際賽效應對聯合國兵團嘅阿仙奴影響較細，3線主力包括華美倫、辛迪卡索拉同禾確特冇踢國際賽，面對又係同一目標爭第4嘅世仇，打甩髀咯，策略可以攻一注上盤再押兩注1.54倍「大」，起碼保本啩？
思捷（330）大股東高沽多年後被揭露反手低吸，財技、眼光嘆為觀止；賭波也一定要值博率行先，英冠有兩隊波，今周可以留意。先取排19位嘅伯明翰主場贏今屆飛躍嘅侯城，前者賣盤一事漸成，近6戰只曾1敗；幾位老兵包括馬龍京治、施積同基斯布基表現唔曳，開出平手盤莊家睇死佢哋未必贏到隻「老虎」，不過老兵唞夠搏盡一擊，有分頭勿太早放棄。另一支，更失望係降班後換帥嘅狼隊，客場3連敗跌至15位；但對手有主場之利嘅屈福特實力更一般，上次因列斯聯早已踢少件，大勝6:1有疑點；英冠興輪流威，狼隊冷W值博。(下次見報日期：20/11)