有人辭官歸故里，當然亦有人漏夜趕科場。雖然市場傳聞股市前景麻麻，本港可能有對冲基金結業，但內地基金公司依然排住隊來港紮根，海通證券（6837）揸住27.8%嘅富國資產管理，喺上環嘅香港寫字樓下周二正式開業。
已攞四號九號牌
海通除咗同法國巴黎投資管理一齊經營海富通基金之外，亦同申銀萬國、加拿大蒙特利爾銀行、山東省國際信投持有富國基金，山東國際信投持有大概16.6%股權，其餘三間各自揸住富國基金27.8%。富國99年喺北京成立，至今年6月底，管理資產近900億人仔，其中公募基金規模喺內地73間基金公司當中排名第九，有500個機構同個人客戶。睇資料，富國香港公司今年9月底先攞到證監會四號（就證券提供意見）同埋九號（提供資產管理）牌，旋即開業做生意。