國際足協日前公佈今年最佳金球10強名單，呢10個由專家選出嘅金球，女足都有一球入圍，大有「世界大同」之意！至於美斯同法卡奧兩大射手，西甲未鬥完，最佳金球又鬥過，認真精采！球迷真係要快啲上官網，為自己鍾意嘅金球投下神聖一票！全年咁多場波，咁多個入球，評審團點選出呢10球，真係冇人知。不過，我求大俠逐球逐球睇完之後，都覺得呢10球好鬼靚，一時三刻都花多眼亂！出名球星除美斯、法卡奧外，仲有山度士前鋒尼馬；至於英超全年咁多靚波，但係就得紐卡素中場賓艾化1月對布力般場足總盃，單騎由中場扭過3人殺入禁區，怒轟入網一球咁大把。
墨國女足都有入圍
仲有啲球員名氣不大，好似玻利維亞波托西國民嘅美拿，真係講都未必有人識。不過，佢喺禁區頂接應隊友傳中，一吓前哥倫比亞門將「狂人」希基達式「蠍子擺尾」，一腳將個波射入死角，球波靚到絕。墨西哥U20女足都有一球入圍，中場謝美莉絲一招差唔多40碼嘅超遠射，射到瑞士女足門將飛到盡都救唔到，我求大俠睇到下巴都甩埋。咁多靚波，我求大俠都係揀咗法卡奧，友賽對阿美利加嘅半車身窩利金球。至於周三瑞典前鋒伊巴謙莫域對英格蘭個倒掛金球，都入得好靚；可惜國際足協唔會將嗰球放入候選名單。投票網址： http://www.fifa.com/ballondor/puskasaward/index.html