「加利仔有3個缺點，跑得慢、唔夠快同埋冇速度。」相信睇開波嘅，冇人未聽過呢個爛Gag。作為傳奇球評人，桂神金句多過Leon，聽佢講波係賞心樂事，估唔到連曼聯分析員都學佢。話說摩通分析員James Sullivan昨日出報告，分析曼聯的前景，三大睇好原因係「搵到錢、減到債，同埋量入為出」。初聽幾有道理，但用番個專業少少嘅術語，咪就係財務狀況改善囉！明明係同一個優點，俾佢一分為三，神乎其技，好波過美斯！報告仲提出一個優點，就係「踢得好」。踢得好係較易吸引贊助，波飛都可以賣貴啲，但睇睇股價，就知投資者唔係咁諗。曼聯8月上市，IPO價14美元，家陣係12.97美元，聯賽排第一，但股價就潛水，點解釋？奉勸呢位分析員要搞清球迷同分析員嘅身份，唔係買咗曼聯股票嘅曼迷，隨時會唔見咗好多張波飛！Samantha本欄逢周一、三、五刊出