【中環Joyce】劉嘉玲前日下晝4點05分喺中環Joyce濕平完離開，一身CHANEL行頭貴氣逼人，由頸鏈、外套到手袋都係呢個頂級名牌，絕對襯番嘉玲嘅富婆身份，唔怪得佢要戴番頂紳士帽同黑超，係咁易扮吓低調啦。
呢日陪嘉玲濕平嘅並唔係老公梁朝偉，而係識咗30年嘅服裝界女友人Wing Fung，一頭短髮嘅Wing因為鍾意中性打扮，之前嘉玲同佢去行山，仲俾雜誌誤認係電影《狄仁杰前傳》嘅攝影師蔡崇暉㖭，不過嘉玲都懶理傳聞，繼續跟同性知己行街玩樂，享受生活，同行嘅仲有嘉玲女助手。
一行三人離去時，Wing發現記者即刻意跟嘉玲保持距離，好似唔識咁鬼咁避忌，女助手就黑面話記者：「夠嘞，唔好再影。」嘉玲則保持禮貌笑容，之後佢哋齊齊上咗嘉玲嘅座駕走人。
採訪、攝影：李志明、羅德光