周三港股反彈，美股即晚玩反高潮，道指重挫185點收市，晉佳原本以為二三線港股噚日會出現洗倉式下跌，點知咁都拖唔冧，隊3%已經算多，唔少股份仲有得升，比估計硬淨得多。但未能完全排除隊完大股隊細股嘅可能性，加上晉佳唔認為港股短期內會重複9至10月嘅強勢，家要買嘢，就要從基本因素良好兼股價硬淨之輩落手，同埋持股唔好快出快入，否則更容易成為大鱷點心。好多人估農業股會係十八大後受惠國策嘅板塊。內地人口多，但農地面積一直下降，未來又要應付農作物需求同控制價格，所以要喺農地上種更多穀物，方法之一係提升機械生產力，第二係用多啲化肥，所以除咗設備股，化肥股都有機會受惠。不過掂唔掂，都要睇行業供需面。年初至今，唔少化肥企業增加銷量，個個都想賣多啲，反令行業供過於求，就係咁壓低咗化肥價格。不過，複合肥價格跌得慢啲，令到個別有出售複合肥嘅企業可以拉闊利錢，今年盤數普遍有唔錯增長。
中線上望二元
為咗應對化肥供過於求，市傳化肥出口關稅政策出年可能放鬆，換言之，化肥企業唔使困獸鬥，搶住喺內地出售產品，部份可轉為外銷，形成內地化肥行業更容易達致供需平衡，算係利好消息。綜合以上要點，行業最壞情況似乎已經過去，目前唔算好好，但有復蘇潛力。中化化肥（297）係內地大型化肥產銷商，今年上半年營銷同生產嘅盈利比例大概係六比四，營銷部份平平無奇，分部溢利下跌3.5%至4.09億元人民幣，增長動力來自生產部份，分部溢利爆升1.53倍至3.04億元人民幣。晉佳相信，隨着銷量增加，未來中化肥收入會明顯上升，但利潤率仍有輕微壓力，加上生產分部增長勢頭良好，綜合嚟睇，盈利能力應該唔會太差。券商平均預測中化肥2012年市盈率10.9倍，估值應該有上升空間，中線持有可上望2蚊。晉佳本欄逢周一、三及五刊出