時裝界新近有H&M × Maison Martin Margiela（MMM），搞到中環H&M門口大排長龍，飲食界都有日清crossover人氣長龍拉麪店「豚王」，兩間公司合作推出兩款袋裝即食麪，每包8蚊，下周五喺各大超市有得賣，雖則話限量發售，但斷估唔使搵排隊黨幫手啩！
8蚊一包 限量發售
豚王人氣超級，連許晉亨、李嘉欣、華置（127）主席劉鑾雄女友甘比都幫襯過，差唔多日日幫襯翠華茶餐廳（1314）嘅股評人鄧聲興（Kenny），亦不時去豚王食碗麪。Kenny聽見豚王出限量即食麪都好興奮，話好想買包嚟試吓，只係擔心即食麪個湯底好難做到堂食咁原汁原味。老實講，豚王一碗麪嘅堂食價要成八、九十蚊，同幾蚊一包嘅即食麪比較，點都知唔會一模一樣啦。