【盈盈樂樂樂盈盈之落荒而逃】電影《古惑仔》的大頭仔錢嘉樂昨日與湯盈盈在尖沙嘴擺酒，朝早先出動陳浩南鄭伊健和大天二謝天華等一班古惑兄弟接新娘，豈料古惑仔竟然出蠱惑，趁姊妹團換衫時衝入酒店房搶新娘，幸被姊妹阻止。身為大佬的浩南哥伊健原本一馬當先，但他一見姊妹炮製的特飲竟龜縮掉頭走，這個大佬真「冇雷」。
現年47歲的錢嘉樂大前日在熊貓證婚下跟37歲女友湯盈盈註冊結婚，一對新人昨日再在尖沙嘴洲際酒店接新娘和擺喜酒。懷孕七個月的姊妹周家蔚、梁靖琪、鍾麗淇、佘詩曼、姚樂怡、關寶慧和文頌嫻等12人擔任姊妹，而大頭仔錢嘉樂昔日一班《古惑仔》兄弟包括陳浩南鄭伊健、大天二謝天華、包皮林曉峰、巢皮朱永棠以及王祖藍、錢國偉、鄭敬基、阮兆祥、金剛和洪天明等12人則任兄弟。
嘉樂飲人奶
眾人昨早11時接新娘，一班古惑仔竟然出蠱惑，趁姊妹換衫準備兼酒店房門口沒人把守時突襲新娘房。文頌嫻昨午儀式後接受記者訪問時笑說：「十幾個兄弟趁姊妹換衫冇防範衝晒入房，嗰陣冇人得閒睇門口，鍾麗淇同阿佘都俾佢哋搶咗做人質，好在我哋㩒得住盈盈房門，好辛苦拉番佢哋出去。」文頌嫻又爆浩南冇義氣，她笑說：「伊健一嚟就好勇行先，但佢一見到我哋準備嘅嘢就掉頭走，我哋準備咗welcome drink款待佢哋，係用啤酒、wasabi、醋同腐乳溝埋，嘉樂嗰杯特別大，班姊妹仲笑話加埋我啲奶落去。嘉樂飲完話：『點解你啲奶咁酸嘅？』」
姊妹團要求兄弟用絲襪笠頭後鬥快脫掉，伊健孖住天華跟金剛與天明鬥快，結果金剛一隊輸掉被罰「食屎」，要吃掉一堆放在尿片上狀似大便的啡色物體。
最後嘉樂與兄弟過關斬將玩遊戲，最後讀出愛的宣言，並以10,000多元開門利是接走盈盈。文頌嫻說：「愛的宣言好搞笑好感動，嘉樂讀肉麻嘢好似痰上頸咁，但大家冇喊出嚟，玩完game我哋啲妝溶晒。」周家蔚前晚在酒店過夜陪盈盈上頭，昨日她穿上姊妹裙與新人大合照時，肚大如籮，跟盈盈一樣搶鏡。
採訪：張俊銘、何慧斯
攝影：陳志嵐、仇志德
