太古地產（1972）上市唔夠一年成為MSCI新貴，噚日市值衝上1422億，呢單消息固然值得高興，但慶祝成立40周年都好緊要，聽聞太地下月8號喺發迹地鰂魚涌糖廠街，搞嘉年華會慶祝成立40年，實行與眾同樂。
冇請達官貴人
好多公司鍾意喺中環、金鐘嘅五星級酒店租場，邀請達官貴人一齊參與周年慶祝活動，太地行政總裁郭鵬就唔興呢套，想實際啲同員工、員工家人，仲有社區居民玩番餐，順便為兩個慈善團體籌款，暫時亦冇計劃邀請高官出席，到時最大粒嘅分分鐘就係郭鵬！太地下月嘅周年慶祝活動名為Street Party，顧名思義就係街頭派對，公司初步計劃擺攤位遊戲、搵人表演唱歌、玩魔術之類，旨在同社區拉近距離，唔係搞公關活動咁話。