昨日報告以業績為主，騰訊控股（700）第三季盈利撻Q，部份大行順手劈目標價，但撐騰訊前景的仍佔大多數，原因不難理解，騰訊身為大藍籌，間間大行都重貨，一時三刻如何轉View，何況科網股估值，券商都係斷估。呢個市況，預測PE達30倍合理嗎？既然冇客觀標準，大行又同坐一條船，只要口徑一致話OK，騰訊就值30倍PE。世事，往往就是如此兒戲。颶風Sandy吹散美國經濟，加埋財政懸崖殺埋身，真係唔知點收科。其實美國經濟外強中乾，顯而易見，鐵路系統百年如一日，好多屋仲係用磚頭、木板搭建，都係因為莫財。今次Sandy風力只是本港八號波級數，但紐約幾十年未打過風，好多屋都頂唔住，成個屋頂唔見咗的隨處可見。
美國風災過後需維修
呢個時候，摩通認為創科實業（669）可以幫到佢哋！集團主攻建屋維修用的電鑽，以及地板護理產品，災民要重建家園，創科應可受惠。此外，其最大客戶Home Depot業績靚仔，證明創科產品賣得。因此，摩通分析員Leon Chik就覺得，創科前景仍然亮麗，維持增持評級，目標價更由16元升至19元，較現價15元，有水位27%。明年預測PE為13倍，較同業貴40%，但分析員話值喎！高明就保守啲，等14蚊先入貨。高明www.facebook.com/AppleKoming