思捷環球（330）呢隻股票真係好睇過連續劇！邢生「完美撤退」多年後，竟然充當「白武士」，翻兜危在旦夕的舊愛，股價今日勢將爆升。不過，佢係純粹炒埋一份，定係有心回巢搞番好間公司，先係未來股價的關鍵。寧高寧一句注入地產項目，殼股僑福企業（207）喪升18%。睇番僑福周線圖，9月炒高兩倍後一直以旗形整固，本周低位大幅反彈，穩守10日線，隨時可藉此消息再展升浪，破旗可先睇前浪頂7.06元，之後就要睇中糧注幾多項目入去。不過，僑福缺點是貨疏，出入較為不便。具同一概念的股份，首推南聯地產（1036），獲萬科入主後，至今未有任何注資動作，但既然買殼，萬科注資是遲早的事，趁目前低價儲貨，潛在升幅可能更大！十八大落幕，資金趁大市反彈炒內房，魏力認為綠城中國（3900）可以吼實。公司自獲吳光正入股後已翻了一番，但企業管治大改善，業績更交足功課，是炒復蘇的穩陣之選。綠城今年首10個月錄得銷售額383億人仔，按年增50%，相等於全年目標96%，超額完成亳無懸念。股價昨突破1年高位，彭博預測PE得4倍，PB為0.9倍，絕對有潛力再上。以3年高位為目標，水位仲有三成。魏力 http://www.facebook.com/2012jason