全城熱烈討論嘅「港女500」事件，唔單止喺網上洗板討論，噚日仲上埋美國《華爾街日報》網站，喺一個名為「中國實時報」嘅欄目入面。文章題目叫做「如何吸引示威者到你的婚禮」，內載今個月初，喺facebook有一名香港準新娘發表咗「五百人情不要來」嘅言論，結果有成千名網民要喺婚禮當日踩場。呢篇報道好認真㗎，既搵咗女事主擺酒嘅酒店回應，又嘗試聯絡女事主；雖然唔成功，但亦搵嚟學者探討香港嘅婚宴潛規則，話一般酒樓人情公價五舊水；但酒店價就可能去到成千蚊，仲話香港嘅結婚開支越來越貴，難怪年輕人負擔都大咗啦。