沉寂咗一輪嘅排隊黨，最近又有新job。中環皇后大道中嘅H&M門外，噚日有成五十幾人霸位，準備今日大掃H＆M同Maison Martin Margiela（MMM）玩crossover嘅靚衫；但查實唔少排隊嘅人只係為他人作嫁衣裳，有排隊黨聲稱幫薛芷倫同王祖藍排定隊，原來呢班藝人，幫手製造唔少就業機會。
八方噚日眼見呢個排隊「盛況」，都問過排頭位嘅兩位女士點解「我為衫狂」；佢哋最初自稱喺中環有間樓上舖，掃貨旨在轉售賺錢；講多兩句先爆料，佢哋其實係代名媛同藝人排隊，開店前最後一分鐘，名媛與藝人先至現身掃貨。
拒絕透露霸位收費
呢兩位女士原來係熟手技工，每次名牌有crossover，都會擔凳仔、霸頭位，連H&M職員都走過嚟同佢哋打招呼。至於同名媛及藝人霸位收費如何？佢哋以商業秘密為由封口。為保飯碗，亦拒絕透露邊個係波士；反而另有排隊黨人士爆料，話佢哋受聘於薛芷倫同王祖藍。
到底薛、王係咪幕後老細？今日自有分曉；但隊龍中都有人想買衫自用嘅。好似有個自稱妹妹係兼職模特兒嘅男士就話，今次crossover嘅靚衫配飾全部以「親民價」發售，真係唔搶唔得。立法會紡織及製衣界代表鍾國斌就話，H&M係走disposable fashion路線，即係着一季就要掉落垃圾桶，用料唔襟，洗多幾洗就走樣，對H&M嘅出品冇乜興趣。
mailto:[email protected]
