鄭子誠1997年加入《真情》，飾演拋妻棄子的李子浩，自此變成幕前奸人；十五年後的今天，乖仔無市場，香港已成妖獸都市，網民轉在網絡宣洩怨氣，自製九輯《音樂情人鄭子誠做衰嘢合集》，高登巴打接力改圖，連盧海鵬扮畢比特宣傳舞台劇都要加句：「有陰謀嘅係鄭子誠！」追本溯源，成奸之路全由一把靚聲而起。
撰文：蔡俊業
攝影：蔡家輝、部份圖片由受訪者提供
創立時裝品牌
鄭子誠本為富家子，原籍中山，曾祖父在港經營出入口貿易生意，「太公派阿爺去上海開分公司拓展業務，爸爸喺上海出世。」民國時期，廿多歲的鄭父已經擁有物業，非常有錢，豈知後來毛澤東打敗蔣介石，共產黨旗幟一揮，富貴如浮雲飄散，「原本擁有嘅嘢唔再屬於自己，咁阿爸咪走落香港囉。」在港邂逅鄭母，相愛、組織家庭及至鄭子誠於1963年出世，共產黨一直如夢魘般隱藏鄭父心，「阿爸好怕共產黨，我成日問佢怕乜，佢總係話：『你唔經歷過唔會知。』我諗家好多香港市民驚共產黨，就係驚唔知將來會發生乜事，對呢種Uncertainty充滿恐懼。」
因此，鄭父決定舉家移民，「1979年我一個人去多倫多，當先頭部隊睇睇乜情況。」他讀寄宿學校，升大學主修時裝設計及採購，「哈，點解要讀？因為當時群住班好鍾意Design嘅朋友，參與其中又同佢哋傾到偈，咪以為自己好鍾意時裝、好有創意天份囉。讀得有啲勉強㗎，畫紙樣畫極都畫唔出心目中嘅Idea，好在副修讀Merchandising，唔係都捱唔到三年畢業。」投身社會首份工作，順理成章是時裝，「同朋友成立品牌Zechin，佢負責設計，我做推廣。」專攻女裝，以多倫多為基地，經常遊走美加推廣產品，兩年後跟拍檔鬧分歧，分道揚鑣，結束品牌。接着，他往百貨公司當櫥窗設計，時間穩定留家機會多了，聽音樂就成為消磨時間的良伴。
為鍾鎮濤發瘋
鄭子誠自小在音樂薰陶下成長，父親鍾愛交響樂，沒甚共鳴，倒是鄭媽媽的口味對他胃口。
「阿媽影響我大啲，佢鍾意聽Carpenters，屋企唱盤側邊永遠有Carpenters嘅碟，我第一隻聽嘅國語歌係姚蘇蓉嘅《今天不回家》，屋企成日播，由朝聽到晚，我直頭識背。」唱盤轉走時光，孩子長大後自然會找自己愛聽的，十四歲時他遇上溫拿，「簡直係神級偶像！我用盡方法都要買溫拿唱片同《好時代雜誌》，甚至用盡方法去睇現場《溫拿狂想曲》。」少男追星，靠搭上搭，透過母親的好友的丈夫在無綫當佈景設計的胞弟搭路，終於可與妹妹往廣播道錄影廠，見到溫拿真身。「我直情癲咗咁望住阿B，嘩，點解咁型？阿妹就對住阿麟發癲，癲到完場之後，觀眾衝出去拉阿B，摸佢件衫，我都有衝出去，不過只摸到衫尾。」大概現在的年輕追星族無法理解何謂「神級」，就是又敬又畏，且永遠生效，「我老婆（劉倩怡）識阿B，有次喺赤柱撞到佢，佢哋兩個傾偈，其實阿B知我係邊個，但我竟然唔敢走埋去。我嗰個年代，見到偶像係要保持距離去欣賞，就算入行咁耐，我呢個心態一直無變。」
除了溫拿，還有陳百強，「好鍾意佢把聲，好Soft，最印象深刻係大碟《傾訴》，佢梳平頭裝，着粉紅色冷衫，好型，好官仔骨骨，有自己風格，唔會時興乜Style就抄。」當櫥窗設計的那段歲月，每看見由十多歲開始節衣縮食用一半薪水買回來的幾百張黑膠片，就想到「有血有淚」四個字，他心想：「如果有機會同更多人分享呢堆唱片就好咯。」碰巧多倫多的多元文化電台請兼職，他一見工就請，「每日只係得幾個鐘播廣東話，我就一星期做兩日，交通、天氣、新聞乜都係我，當然仲要播歌啦，就係咁慢慢收到聽眾回應，話今日播首歌好好聽，咁就好開心，亦越做越有興趣。」
開咪寫論文照稿讀
當職業添加了興趣元素，自然越做越順，一年後他與同事自資開電台，買時段再次做老闆，先後成立「安省商台」及「多倫多廣播電台」，AM、FM頻道各一，時為八十年代中期，「我哋係其中一間加拿大電台最早有香港特派記者，每日要聽電台睇報紙再寫Summary，然後用長途電話同記者錄音。去到後期，公司都有四五個DJ，包括李思捷家姐李思維，都係我請返嚟嘅。」
1989年，他決定回流擁抱香港幾百萬華人聽眾市場，惜沒有人脈，只好加入香港電台當文職，結果認識了事業上的伯樂──當時二台台長張文新，「佢覺得我英文好，搵我幫手處理日常英文信件。」剛巧新城開台，大批DJ過檔，主持《夜半一點鐘》的胡啟榮另謀高就，千載難逢的機會就這樣給鄭子誠遇到，「有日新哥突然同我講：『你做開電台㗎呵？不如試試做呢個節目啦。』我緊張到暈，開咪頭兩個禮拜都錄定音，之後到真正做Live就寫定晒要講乜，唔係Point form，係成篇文。聽番真係好難聽，好似背書咁，無感情，無Rhythm。」貪新鮮是年輕人特權，沒多久他過檔亞視當甚麼對外事務部副總監，「做半年就撇，因為根本無呢方面經驗，對住班資深製作人開Chair meeting，自己無料到，好難做。」一年多後，伯樂再次召喚，因為陳海琪離開，他接替同一時段節目《今夜真情》，「做咗五日，老闆見我，話我做得唔錯，不過無乜新意，洪朝豐Propose嘅新節目《日月星辰》會頂替我一至五時段，結果我個節目得番一日。」塞翁失馬，正正因為靚聲，招徠有線電視注意，「當時有線剛開台，新知台有超多紀錄片要配音，佢哋聽到我把聲就搵我幫手，之後我又做埋節目主持，做做吓就收到《城市追擊》電話。」為十五年後高登巴打口中「完美奸人」埋下誕生伏線的，歸根究柢是自己把聲。
無陰謀只想播歌
在《城市追擊》的半年，鄭子誠至今仍難以忘懷，「本來諗住坐廠，點知要同娛記跑新聞，一個三十幾歲嘅麻甩佬，永遠係最落後嗰個。」他受不了問低級問題，「收風話夏蕙姨攞飯盒畀祥嫂食，我職責就係問佢：『乜嚟㗎？』一睇就知道係飯盒啦，『唔該打開個飯盒畀我睇睇！』其實我問唔出口，但受人二分四嘛。」意興闌珊，他知道再這樣做下去會比死更難受。又某日，他突然收到《真情》監製徐遇安電話，游說他試鏡，就這樣，香港電視史上從此多了一個經典奸人李子浩，「對住曾江、黎宣、關海山、劉丹、司棋姐演戲，全部都係資深演員，我當時太新，點記對白、點走位、點唔拖累呢班資深演員，諗番轉頭就覺得做《真情》好正。」
鄭子誠的真身，是訪問時吃百力滋、遇到笑位會響亮大笑的四十九歲阿叔，平易近人，毫無奸味。為何高登巴打會覺得他奸？指他做任何事也充滿陰謀？甚至封他做「陰謀誠」？輪廓固然是原因，他只消瞇瞇眼皺皺眉便有奸狡效果，「由細到大，屋企人、朋友都話我乖仔，我真係乖仔喎，唔係反叛青年，從來無諗過自己奸，係徐遇安第一個話我『眉宇間帶點奸意』。」或許，與他的招牌低沉聲線也有關，有聽過他順應網民要求，在上星期港台節目《Gimme 5》演繹高登潮文《豆腐火腩飯》嗎？真是感性中帶點陰謀。現時他當《音樂情人》節目主持人，主打八九十年代廣東歌和國語歌，逢周五更會重溫昔日《中文歌曲龍虎榜》十強，上月中，他開咪回應「鄭子誠現象」：「做《音樂情人》呢個節目宗旨好簡單，無陰謀㗎，淨係想播歌。」是的，香港群魔亂舞，有陰謀的都在政總、立法會和中聯辦，絕對不在這齷齪的直播室。
