世界各地未來3季嘅英超轉播權逐一落實，好似香港嘅now TV喺有線度搶番個轉播權。英國傳媒報道，英超嚟緊3季嘅轉播收益好可能破紀錄突破50億鎊（約616億港元），賽會、球會同班球星繼續發過豬頭。我求大俠諗諗吓，羊毛出自羊身上，英超咁發，我哋香港球迷其實都有份出力，每個月畀錢收費電視台間接供養班球星。
球會球員豬籠入水
喺落實咗嘅轉播權入面，英國電訊同天空電視台以高過之前3季一倍的價錢，用咗約30億鎊買咗個本土轉播權。雖然唔少海外轉播權仲傾緊，未有實數，但睇番過往數據，07-10呢3年賺6.5億鎊，10-13球季就急升至14億鎊；如果跟番趨勢，相信嚟緊3季嘅海外轉播權隨時有20億鎊，加埋英國本土個數，好可能達到歷史性嘅50億鎊。電視轉播收益以倍數急升，最開心莫過於球會同球員。喺上季嘅收益表（見附表），冠軍曼城袋咗6,060萬鎊，就連包尾嘅狼隊都有近4,000萬鎊，真係賺到笑。球會收入多咗，用錢自然豪氣啲，所以啲班霸先可以郁啲就畀班球星成20萬鎊周薪；家英超最高薪嘅球員係耶耶托尼，每星期緊曼城約22萬鎊。
香港球迷又煩cut台
英超轉播收益屢創新高，我哋香港球迷都「功不可沒」，盛傳近6季嘅英超轉播權，now TV同有線都分別用咗大約15億港元（每3季）投番嚟。問到嚟緊3季嘅轉播權用咗幾多錢爭番嚟，now TV發言人話家同英超賽會仲係獨家磋商階段，仲未落實，所以未有確實數字。不過，兩間電視台之前蝕到怕，所以據聞今次嘅出價冇對上兩次咁高。當now TV星期二晚公佈攞咗英超轉播權後，網上球迷都議論紛紛，唔少人都讚now TV嘅服務同講波水平都好過有線，係個好嘅轉變。不過，好多為英超而裝有線嘅球迷就好煩惱，諗緊點樣對付連希特拉都cut唔到嘅有線！
網民反應
now TV製作質素好過有線！dura：「now真係正萬倍，好過有線班講波佬，now嘅配套都好超多啦！」legolaswai：「正呀喂，我鍾意now啲講波佬多啲！」now TV同有線夾份玩球迷！曼聯小霸王：「根本now同cable夾好晒，兩台輪流播！」美國佬發窮惡：「歐聯喺k寶（有線），英超喺now，麻鬼煩！」好驚now TV加價！7BC：「我6月歐國盃個陣join左now嘅超強體育組合，希望唔使加錢都有得睇。」oichu78：「一向裝晒now同cable，只求cable會減啲價，now又唔好加得太過份，條數咁上下就算，不過都幾難嘞！」大劑！有線好難cut！J.靴南迪斯：「有線份約去到2014！我有咩辦法cut到佢！」btcombridge：「我下年3月到期，都唔知用咩方法cut，可能要搵區議員或記者幫手！」資料來源：香港討論區