近年要過的節日真係越來越多，除咗方便商家乘機推銷掠水之外，我真係諗唔明點解連七夕、萬聖節都要特登去慶祝。家仲有一個更加無聊的節日──11月11日光棍節。各位單身男女可以互送禮物，振作一下，強調自由係有幾咁可貴。到底邊個發明光棍節呢？海迪唔知。不過將佢發揚光大的，應該係阿里巴巴。事關佢哋嘅淘寶（Taobao）和天貓（Tmall），最近搞咗個光棍節大減價，單日銷售額竟然高達191億元人仔，係舊年美國感恩節後「網購星期一」（Cyber Monday）銷售的兩倍！完全反映到內地人對網購有幾咁瘋狂。內地網購係一門大生意，但至今無人可以話自己掌握到賺錢的竅門。阿里巴巴算係唯一搞網購賺錢的一間，因為無論係「B to C」的天貓，定「C to C」的淘寶都好，阿里巴巴都純以提供平台服務的模式經營，自己唔使坐貨，亦話之商戶割喉減價。但真正屬於網購商的京東商城，近日就要籌錢打減價戰，蘇寧和國美（493）網站繼續蝕錢。根據外國經驗，網購商最後贏家只有一個，浴血戰會好慘烈，家就下注未免太早。海迪