上星期六跑完馬，到會所「銀袋」吃碗牛筋腩湯米，就在會所外坐的士直奔尖沙嘴文化中心聽香港中樂團嘅「古韻今風」中國歌樂，賓架Ｗ除咗送飛之外，仲請埋客在喜來登吃晚飯。左丁山本想去埋一份，但諗起上次由喜來登行過去文化中心，要行地下通道，極不方便，有排行，都係坐的士直達文化中心好過。果然，坐的士雖然在紅隧有塞車，但過咗油站去尖東就直通快車，七時半過後已人在大堂，反而賓架Ｗ等一行人只係在入場前最後一分鐘趕到。本來如果有一條天橋，由喜來登或半島過去文化中心，話都冇咁易，但香港往往有好多莫名其妙嘅理由，係要逼使行人過唔到馬路，變成咫尺天涯咁款，真難搞。
歌樂晚會自然冇得彈，左丁山呢類聽慣下里巴人嘅冇文化小市民，望住數碼字幕，聽大師級人物男低音龔冬健唱「滿江紅」、「大江東去」，都識得幾句，聽女高音黃華裳唱「我住長江頭」，就想起中學時期聽抗戰歌曲，依家先至知道原來啲真正歌唱家係可以咁樣唱歌嘅，同場和唱嘅有男拔萃女拔萃學生合唱，以為係兩間學校各派隊員，誰知不然，此乃「拔萃高級混聲合唱團」（Diocesan Schools Choral Society），由男拔女拔高年班同學組成嘅合唱團，攞過世界合唱比賽金獎，金牌與世界冠軍等獎項，最近在第七屆世界合唱比賽中得到95.88分，於聖樂組獲金牌，累計成績在全球高級混聲合唱團排行全球第十一，真巴閉！次日星期日睇「蘋果日報」訪問男拔校長鄭基恩，佢就係呢個合唱團嘅指揮，直至今年九月就任校長為止。
威水名校學生讀書成績叻，唱歌達世界級水平，殊不容易，香港有此等學校，小市民與有榮焉。中場休息時，一企起身，發現左右隔籬都有朋友、校友在，於是傾偈傾足十五分鐘，與前考評局主席顧爾言，高錕慈善基金會董事唐世煌傾到咁上吓，見到會計師公會副會長趙麗娟行過，於是介紹佢與顧爾言認識，誰知顧兄一望佢嘅卡片就問：「你係唔係聖心㗎？」蘇珊娜為之愕然：「你點知㗎？」啊，顧太站在附近，佢就係蘇珊娜之聖心老師，兩人多年不見，來一個小熊抱，世界真係小小小。