港股噚日彈升253點，但成交僅483億銀，力度一般，不過個別具概念嘅股份有理冇理照樣破頂，值得尊重。早兩日建議買嘅北人印刷（187），噚日成功突破前高位2.72元，走勢一流，有跟進嘅戰友可坐定定，等候高位食糊。今日推介另一隻破位股創維數碼（751），集團剛宣佈10月電視機銷售數字，總量及總額按年增長36%及30%，較9月增幅不足三成更厲害。事實上，家電下鄉將於明年1月到期，政策延續傳聞成為創維升市嘅催化劑。截至3月底，創維全年賺12.5億銀，增6.6%，歷史市盈率9.6倍，彭博綜合券商預期今年市盈率7.9倍，即預計全年盈利升兩成，以上半年猛烈增長計，估算略嫌保守。創維噚日以大陽燭炒高7.6%，收報4.55元，創今年新高，短線走勢一流。集團將於月底公佈中期業績，資金追捧績優股，創維有望再闖高峯，以預測市盈率9倍為目標，可見5.18元，潛在升幅14%。唐牛