菲菲係茶餐廳常客，貪佢充滿香港精神「快、靚、正」。講Fusion菜，茶餐廳一定係玩得最癲，中西法日意一張餐牌有晒！問你死未？翠華（1314）上市，標誌茶餐廳出頭天，但市盈率16至19倍，同餐牌一樣──都係好貴。話佢貴，其實貴得有道理，一來多位於旺區，舖租貴；二來分店定位清晰，學志明話齋，蒲完老蘭，點都要去一去翠華照燈，理得貴過出面幾多，變相抬高議價力；三來翠華為吸引遊客，開拓形象工程，靚餐牌、靚Tee樣樣都係錢。餐牌貴得起，股價又值唔值？翠華用23年開26間分店，但要未來3年開多34間，仲力攻內地，難度極高。中港營商環境唔同，一過境好易水土不服，當地膽唐宮（1181）業績都令人跌眼鏡，過江龍唔見得會爆冷跑出。更重要係經驗話畀我哋知，食肆一出名，就會越嚟越難食。買翠華？都係去買個奶油豬算數。Fifi本欄逢周二、四刊出