郭羨妮同陳錦鴻噚日喺將軍澳電視廣播城為無綫新劇《初五啟市錄》,拍一場白馬王子騎馬戲,陳錦鴻以民初王子look同郭羨妮齊齊騎白馬,好彩佢哋以前拍劇都騎過,所以總算唔係初哥。
不過,陳錦鴻話點都有壓力,因為怕跌親郭羨妮,好彩拍檔都已經生咗小朋友,不過一聽到郭羨妮話要再生嘅時候,佢都即刻話要小心啲。已有一女嘅郭羨妮話拍完要休養身子,之後再努力造人:「家任務好重大,準備再生第二個。」
錦鴻諗計治仔
噚日無綫搵嘅白馬好彩都好乖,所以郭羨妮同陳錦鴻上馬都好安心,但係郭羨妮話佢七、八年前喺內地拍劇時都曾經墮馬受傷,好彩冇傷到骨,不過今日都唔會擔心騎馬有危險性,因為細個有學過。
另外,噚日係陳錦鴻同郭羨妮拍最後一日戲,陳錦鴻話會好好休息返去湊仔,因為囝囝呢排功課退步晒:「我比太太更了解個仔,我會好有耐性同方法去對付佢。」
撰文:馮仁昭