公民黨毛姨姨早幾日去咗亞洲電視場騎呢爛騷踩場，點知俾保安人員拒絕放行之餘，仲被成班亞洲先生以重重「雞扒胸」包圍，以便將佢同亞視老闆王征分開，等王征可以聲大大鬧毛姨姨「滾回去」。
路過湊熱鬧
同雞扒胸有過零距離接觸嘅毛姨姨，噚日憶述當時情況時神態自若咁話，當時真係一啲都唔驚噃，唔係咁神色慌張啫。相反，佢嘅感覺仲好鬼有娛樂性㖭。佢自爆當時實際上想去立法會停車場，路過見咁多人，咪湊吓熱鬧囉，點知成為王征眼中釘啫。毛姨姨俾大隻佬包圍，羨慕死唔少剩女，點知毛姨姨覺得呢班亞洲先生冇乜料到；原來佢嫌呢班佢哋好瘦、冇乜肌肉；佢個人向來睇樣唔睇肌肉嘅，覺得現場有一位男士相貌唔錯，值75分㗎。