投行同銀行好興透過贊助運動比賽，同各地客戶聯誼，好似高爾夫球、足球同七人欖球賽咁，瑞銀最近就首次同香港藝術中心合作，攞出37幅普普藝術（Pop Art）作品公開展覽，展期由周六至本月底，其中有幾晚特別邀請客戶參觀，咪就係用來聯誼囉。
共擁3.5萬件藝術品
瑞銀過去一直有收藏各地藝術作品，至今擁有3.5萬件，但冇收收埋埋，而係擺喺各地瑞銀寫字樓，最多應該係放喺瑞士總部。聽聞中環國金寫字樓都放咗20至30件藝術品，即係話掛喺大佬房、走廊位嘅畫全部都係瑞銀專登買嘅藝術品，唔係普通貨色。瑞銀今次展覽嘅37件普普藝術品，大部份係畫作，聽講全場作品估值有成幾億銀，其中一幅估值過千萬美金，係Roy Lichtenstein（利希滕斯坦）嘅《Post Visual》。普普藝術發源於五十年代尾嘅美國，之所以吸引大家眼球，皆因畫作同消費文化、商品化關係密切，容易產生共鳴，最為人熟識嘅作品就係Andy Warhol（安迪華荷）嘅《金寶湯罐頭》系列。瑞銀之前都有借畫畀東京森美術館、倫敦泰特現代美術館（Tate Modern）展覽，香港就係第一次，正好喺淡市中畀瑞銀同客戶搞好關係，大眾亦得益瑞銀香港區行政總裁羅振綸話，瑞銀買藝術作品作收藏，唔係投資等升值，唔係隨便賣㗎！李華華mailto:[email protected]