修身堂（8200）同客仔齊齊玩瘦身！呢間堪稱第一代搞纖體嘅美容公司，噚日公佈截至9月底止第二季業績，盈利按年縮水97%，得番29.6萬，半年計亦只得236萬，倒退88%；以主席張玉珊舊年人工267.3萬計，公司真係賺埋都未夠出糧。
業績走樣唔出聲
業績衰到冇朋友之餘，細數亦唔多對辦，應收賬無厘頭大升43%，去到1.3億，當中逾期金額仲勁飆12倍，相反現金就得番7539萬，少咗三成有多，只可以講句應瘦嘅唔瘦，應肥嘅唔肥。公司家主要收入來自分銷SK-II同埋Olay等化妝同護膚品，估計係令到應收賬肥腫難分嘅原因。修身堂舊年成功扭虧為盈，仲出晒盈喜通告，今年業績極速走樣，就冇乜預告，似乎係報喜不報憂，唔知佢哋對客人嘅態度，係咪都係咁呢？