三獅兵每次點兵，都總有一啲新面孔，而且老少通殺；今次點兵鬥瑞典，就啱啱好點咗一位老人家同一位仔。31歲嘅愛華頓中場奧士文好似臨老入花叢咁，話唔單止自己驚訝，連佢7歲嘅囝囝開頭都唔多信，搞到佢要上網撳入段新聞，俾個仔睇先至信。老將要喺國家隊企穩陣腳，真係比後生仔難好多，奧士文就話想好似老友柏加咁，越老越可愛；但我求大俠最驚佢好似森莫亞同保夫萊特咁，入選一兩次就係咁先咋。
相反，另一位「新仔」韋費特沙夏（唔係新特蘭嗰位老將）就大把本錢，得嗰20歲，仲要喺英冠水晶宮搵食都有得入選，搞到佢有少少囂；最近接受專訪時，佢就話：「除咗C朗同美斯之外，我唔會認為有其他人好過我，所以其他人唔會係我嘅榜樣。」老老實實，唔好吹水喎，真係有料先好咁講！