今晚英格蘭對瑞典嘅友賽，將會係謝拉特第100次為國家隊上陣，可喜可賀！為咗慶祝達到呢個里程碑，謝拉特決定玩複製傳奇，效法前英軍隊長卜比摩亞，同99個帶住喼帽嘅小朋友合照。兩代英格蘭隊長，事隔39年嘅兩張照片，相信勾起唔少老球迷嘅回憶。
「卜比摩亞係英國足球象徵」
年輕一代可能未聽過卜比摩亞，但相信大家都知道英格蘭捧走66年世盃，而卜比摩亞就係嗰隊冠軍隊嘅隊長，所以佢係首位、亦係暫時唯一一位拎過世盃嘅英軍隊長。喺73年嘅情人節，31歲嘅卜比摩亞迎來職業生涯第100頂國家隊喼帽，代表英格蘭作客蘇格蘭；為咗紀念呢件事，佢喺情人節前一日搵咗99個小朋友番嚟，帶住喼帽，一齊影咗張合照，流傳後世。望住呢張相，唔少老球迷都會諗起英格蘭真真正正嘅黃金一代，同埋佢哋唯一拎過嘅世盃冠軍，真係欷歔不已！39年後，現任隊長謝拉特今晚亦將第100次為英格蘭上陣。為咗向卜比摩亞致敬又好，搞吓噱頭又好，喺前一日，英國《每日郵報》就別出心裁咁搵咗謝拉特返母校（Huyton-with-Roby Church of England Primary School），仲搵埋佢99個師弟師妹帶住喼帽，同佢影咗輯相，紀錄呢個百場里程碑。謝拉特話：「未決定影呢張相前，我都未睇過卜比摩亞張相。我今次特登上網搵佢張相嚟睇，好開心有機會可以再影一次；因為卜比摩亞係英格蘭嘅傳奇，亦係英國足球嘅象徵。雖然我唔係太鍾意影相，但今次係例外，我諗起幾十年後，同屋企人睇番呢張相時，感覺一定好正！」一件咁有歷史意義嘅事，喺一個咁值得紀念嘅時刻，仲要喺一個充滿細個回憶嘅地方，鐵漢終於展露柔情；講講吓，謝拉特忍唔住盡訴心中情，「準備嘅時候，我喺操場行咗一圈，成個職業生涯發生過嘅畫面一一喺腦海浮現。我4歲嚟到呢度讀書，我想像唔到自己竟然有幸100次為國家隊比賽。呢個操場仲係我第一次踢波嘅地方，嗰陣屋企人完全冇諗到我會做到國腳。」或者最遺憾嘅係卜比摩亞已經喺93年去世，未能親眼見證呢個新一代嘅百戰傳奇，但可以肯定嘅係英軍隊長鐵血不死嘅靈魂，已經傳承到謝拉特身上。
