亞視周日吹雞到政總反對發新免費電視牌照，全城鬧爆，申請咗免費牌照嘅城電（1137）同有線（1097）噚日竟然分別逆市大升8%同6.7%，而且成交亦增加。城電就話可能鬧鬧吓攞到牌啫，有線升乜呢？唔通有春江鴨知道有線冇得播英超，可以慳番筆巨額轉播費？
城電主席王維基近日發出最後通牒，講明一個月內政府唔發牌，就會提司法覆核，搞到投資者即刻撲貨，其實都有道理，若然鬧完一輪政府發牌畀城電，城電就正式轉型為媒體股。
攞唔到牌都唔緊要，城電有30億現金，等於每股現金3.7元，打個八折都有2.96元，城電噚日收報1.88元，最識計數嘅芬佬肯定知點做。至於冇咗英超轉播權嘅有線，慳番筆巨額轉播費係好，但係肯定流失客戶，一來一回真係唔知賺定蝕嘞。