翠華茶餐廳（1314）今招股，如成功上市，五位創辦人除咗榮升上市公司老闆外，亦晉身億萬富豪之列。以招股中間價計，大股東兼主席李遠康，手持28.5%股份市值7.9億，持股量最少嘅張汝彪，手持股份亦值1.3億，身家水漲船高。
五位老闆89年合作買起新蒲崗翠華餐廳，發展至今，翠華上市後，五位合共持有70.35%股權。
公關洗腦衫上陣
李遠康同何庭枝揸住最大份，何氏持有22.1%；張汝桃、張汝彪兩兄弟同張偉強持有4.76至8.56%，以招股中間價2.08元計，市值全部過億。雖然一日未沽，都係紙上富貴，但感覺應該相當良好。
李遠康噚日解釋點解揀「一生一世」做股票編號，就話貪佢易記，同埋希望翠華永遠陪伴香港人。記招上，一班公關脫下套裝，換上「我愛翠華」T恤，想唔記得都好難！