雖然恒指9小時RSI呈底背馳，短線嚴重超賣，可能會有些少反彈，但周線圖出現雙周轉向，係強烈嘅中線轉弱訊號，相信本周以至下周都走唔出調整漩渦。如果高波幅股票跌得多，高位調整幅度去到兩三成，之後相信仲要一段時間恢復元氣，年底之前都好難發圍。之前散戶猛話年底見23000，邊有咁筍，睇嚟大家寄望出年好過。
家港股同04年第二季嘅調整有啲似，由03年5月升到04年2月，連續10個月一帆風順，累升近七成，之後恒指喺月線圖保歷加通道中軸嘅11000左右見底，高位回吐兩成。
事實上，呢轉中線升浪比晉佳原先估計遜色，指數由6月頭約18000，升到11月頭略高過22000，只係升咗兩成多啲，其中9月頭去到11月頭連升9周，似足03年5月開始嘅升浪縮水版，不過累積升幅差好遠。
跌至20570先撈貨
恒指由6月初到11月初只升約4000點，要調整都未必跌好多，04年3月至5月調整跌足兩三個月，相信今次調整會濃縮到三幾個星期。由於周線圖保歷加通道中軸現處於20451，月線圖就喺20570，相信呢個位有強大支持，如果真係去到呢個位就要撈吓貨。
不過，指數回調幅度有限，唔代表二三線強勢股可以避過一劫。上周四、五恒指急插超過700點，當時二三線股依然硬淨，本周一恒指回穩，但尾市就有一批質素最爛嘅民企股急插，按照市場規律，通常洗倉由最差嘅股份開始，然後蔓延到高處不勝寒嘅強勢股，所以各位見到低位升超過一倍嘅中國無線（2369）、安東油田（3337），噚日跌半成左右，如果港股目前身處中線調整，二三線股嘅洗倉潮就唔似跌少少就完事，以安東油田為例，6月底王今升咗超過一倍，如果面對二三線股洗倉，高位殺落嚟冇兩成又點算多，由高位2.74元計算，要跌到去2.20元先至夠兩成，即係短線有跌多一成嘅風險，所以現階段最好就係耐心等吓低吸機會。
晉佳
本欄逢周一、三及五刊出