搞騎呢爛騷反發牌嘅亞視，遭全城鬧爆；CCTVB咪陰陰嘴笑喎，事關佢哋近日亦被網民鬧爆。話說CCTVB上個星期六播出嘅《新聞透視》探討「鬧爆文化」，搵咗鮮魚行校長梁紀昌同小豪子曾志豪等人做「鬧爆」受害者，唔少網民鬧爆節目唔應該「反鬧爆」，久未露面嘅事旦男亦話節目唔持平，為此準備好再狙擊CCTVB。
究竟網民有幾唔like？從網民「朗思」專登整圖「鬧爆」呢個不公義嘅本土議題可見一斑。原來佢睇完節目後，即刻寫公開信畀節目策劃翁振輝，自爆翁曾經約佢做訪問，好彩拒絕冇「中伏」。佢話假如香港有真民主，香港人就唔使「鬧爆」；家市民處於弱勢，唔「爆」就冇人聽，仲話香港淪落到咁，CCTVB「功不可沒」。
事旦男：內容唔持平
呢封公開信喺facebook有近九百個like，網民都睇唔過眼繼續鬧爆，有人話喎，「從來只有共產黨等極權政府先會話人為鬧而鬧，令自己壓迫人民弱勢顯得合理！」亦有人話鬧爆文化其實係「救命文化」，因為傳媒冇報道害民政策。
久未露面嘅事旦男亦鬧爆節目，話內容完全唔持平，例如冇同時講到反國教人士都受到辱罵，質疑無綫係咪以為政府唔再發免費牌，自以為一台獨大為所欲為？佢計劃隨時再出招狙擊無綫，叫無綫咪咁得戚。
通訊事務管理局暫時就收到一宗投訴。
mailto:[email protected]