美國大選過後，共和黨擁躉大為沮喪。呢日在中環碰到一位美國賓架Ｈ，已經係幾十歲長者人物，數星期前收到大信封，冇咗份工，房屋津貼冇埋，睇怕一兩個月之內一定要返回紐約，但佢對香港與亞洲依依不捨，仲想試吓搵工，問計左丁山，左丁山坦白同佢講：「今天之銀行業務興食快餐，不講求長期關係之作風，已非你所能適應，加上亞洲公司唔係特別重視老人家之經驗，不如都係返去紐約好過，起碼還有社會保障金可拿。」點知賓架Ｈ大發牢騷：「離鄉數十年，美國已非我所認得之美國，紐約天氣凍，物價貴到死，出外食餐飯亦硬性俾18%貼士，再加營業稅，餐廳與政府簡直搶錢，我不如到泰國清邁或者布吉退休好過，天氣和暖，靚女多，物價平，食物好，我仲可以負擔得起請一位女傭㖭。有少少錢自己用好過返美國交稅養懶人。」
唔，講起養懶人，據「紐約時報」一位專欄作家講，共和黨窮得只剩下grumpy old white men（愛發牢騷的白種老男人）支持者，話俾賓架Ｈ聽，有此一說，佢不怒反笑：「啱呀，我就係呢種人。我嘅大學女同學（白人）從L.A.來電郵，話對奧巴馬連任感到絕望，佢出身貧窮，辛苦半工讀完成大學課程，成為律師，嫁咗一個白人工程師，兩夫妻有三子一女，三子都係醫生，女兒係律師，當然係年入二十五萬美元以上，會俾奧巴馬行將徵收富人稅嗰類家庭。佢話好唔順氣在加州交重稅，津貼拉丁美裔，非洲裔及白人女子吃避孕藥，墮胎三次以及未婚產子，美國正在歐洲化，社會福利大躍進，邊個付鈔呀？咪係我地白人與你地亞洲裔美國人囉！」
唔怪得話呢次大選暴露美國已一分為二，黑人94%投票俾奧巴馬，拉丁裔70%擁奧，女人55%擁奧，白人58%支持羅姆尼，將來白人會變成美國少數族裔，年老白種男人更加冇地企，共和黨想贏番白宮，必須轉軚，但如此一來，茶黨會變得更激進，美國政治更加兩極化！賓架Ｈ最後講：「移民到泰國退休可能係我最佳選擇，可以遠離美國是非。」左丁山忽然醒起，同佢講：「咁樣會放棄身為美國人的尊嚴與榮耀！」賓架Ｈ瞪左丁山一眼：「唔好講廢話，我就嚟連美國護照都放棄埋，在香港工作十年，可以攞香港身份證！」