憑做爛騷成名嘅亞視，噚日第N次搞《感動香港》系列活動，邀請喺呢個節目有份選出感動人物嘅評判，講吓做評判有咩感受喎。節目噚日喺亞視錄影，有幾行凳寫明係嘉賓席，但由於嘉賓唔夠數，亞視惟有重施故技，出動亞視員工充撐場面。查實亞視員工份糧，係咪包埋做佈景板㗎？亞視邀請20幾個評判，逐一分享個人感受，但嚟嚟去去都係「個個人物都好感動，真係好難揀呀！」等畀面說話。擔任評判嘅立法會議員計有曾鈺成、林大輝、林健鋒同馮檢基，但佢哋個個發言之後，未等節目完結就即時鬆人，唔通係怕亞視會叫佢哋學王征咁，即席跳番part舞？