初試啼聲就當選嘅立法會建築、測量及都市規劃界「梁粉」謝偉銓Tony，認真唔可以睇小，佢嘅選舉經費係29萬鬆啲，但就有成32萬選舉捐贈喎，其中10萬蚊嚟自佢舊老細、英皇集團主席楊受成。剩低嘅錢Tony全數捐畀聖約翰救傷隊。
張華峯3萬5跑出
至於敗喺謝偉銓手上、連任失敗嘅劉秀成，1蚊捐贈都冇，選舉經費卻高達17萬，算唔算雙失？講到要慳住使嘞喎，勝出金融服務界嘅張華峯都好有計。佢使咗唔夠3萬5蚊就跑出，少過一眾對手；好似鄧予立咁，使費高達12萬幾，結果都係輸囉。直選方面，喺新界東輸咗嘅經濟動力邱榮光，開支高約188萬，同收到嘅捐贈就相若，包括經濟動力捐咗60萬、經動總幹事葉振東亦捐30萬。最騎呢係一位捐出10萬蚊嘅鄭眾宏先生，其後又以派傳單之名收番9.5萬費用，呢頭捐完嗰頭收番，唔知搞乜？而邱榮光亦貢獻咗9千幾蚊罰款畀食環拆違規街板。