曾幾何時，思捷（330）乃藍籌股王，市值有成2000億銀，夠晒巴閉。可惜近年管理層經營不善，接班人一蟹不如一蟹，上月底仲要供股抽水大救亡，咁搞法，股價當然又「撕」又「折」。原來思捷喺49隻藍籌嘅市值排名，已經跌到包尾，一個唔覺意，隨時俾人踢出成份股行列。
百麗零頭都夠贏
以噚日收市價計，思捷總市值得番212億，由高位蒸發九成，喺恒指成份股中敬陪末席，比起尾二嘅中遠太平洋（1199）仲要少76億，叫做僅僅睇到人哋尾燈；同為零售股嘅百麗國際（1880），市值高達1230億，名符其實零頭都夠贏思捷。
咁啱恒指公司呢個星期五進行季度檢討，大熱染藍股份包括農行（1288）、銀娛（027）同昆侖能源（135）等，隻隻市值以千億計，要踢走思捷話都冇咁易。
唔知係咪費事俾人問思捷冇得做藍籌點算，定係忙住勸股東參與供股，思捷主席柯清輝噚日出席城大榮譽博士學位頒授典禮後，粒聲唔出就走咗。其實都可以理解嘅，柯大俠退休前係星級賓架，今年中走馬上任做思捷主席，大家都有些少期望，如果轉過頭連藍籌地位都不保，真係好難講得過去，唔講好過。
李華華
mailto:[email protected]