除咗財政懸崖，近期Talk of the town一定係新股，當中港人最熟悉嘅當然係翠華。呢家做奶油豬出晒名嘅茶餐廳，近排以「巴塞模式」擴軍，開行Turbo搞上市之心路人皆見。以預測PE 16至19倍計，估值同佢賣嘅奶茶一樣──絕對唔平。當然，新股上市初期只炒供求，幕後人夠硬淨嘅話，砌上絕無難度；至於想長揸嘅戰友，唐牛建議要用實名持股──博第時股東會可以擦番餐嘛！
新股熱潮受惠股，通常只會諗到港交所（388），其實有隻半新股同樣有景，講緊嘅係財經公關皓天財經（1260），3月上市，招股價1.39元，除咗頭兩日，其餘時間一直喺水底，投資價值卻因此浮現，現價PE僅5.3倍，手頭淨現金4.3億銀，其中1億元最近用嚟投資擔保票據，一年回報率近6厘，雖有不務正業之嫌，但總好過擺喺銀行。近期走勢呈大圓底，成交暢旺，趁呢浪炒番上1蚊，已經有18%水位，屆時較招股價仲潛水28%。
唐牛