自由行威力大減，貴價珠寶同鐘錶今年銷量大減，做開內地富豪生意嘅太子珠寶鐘錶，上半年生意按年大跌兩成，好彩公司轉身快，即刻開條新線「Just Watch」，賣5000蚊至1.2萬嘅中價錶，吸本地後生客仔，希望以量取勝。Just Watch代理嘅錶，同太子珠寶賣開每隻講緊十幾萬起嘅錶，差天共地，不過都係面對現實啫。太子珠寶鐘錶執董朱繼陶噚日講，進軍中價市場，係希望以銷量去填補大額生意下跌，基於成本問題，暫時只會喺潮人商場開舖，唔會用高價搶街舖。佢話，近年珠寶鐘錶生意每年有四至五成增長，今年要跌都唔意外，瑞士出口鐘錶量減少已經反映實際市況，佢用足球做比喻:「上半場（即上半年）已經輸緊三比零，下半場就算急起直追，都唔望反勝，打和都收貨。」