恒生銀行（011）明年3月慶祝80大壽，超過9600名員工率先收到喜訊，唔係加工人，而係額外有300蚊80周年團隊活動特別津貼，連埋每年原先有嘅700蚊，明年每位員工有1000蚊活動津貼，大數都有成千萬㗎。
股東有乜呢？
不過作為恒生股東或者存戶，梗係最想收到特別股息、特別存款息、減服務收費咁啦，恒生一姐李慧敏不妨諗諗佢。恒生明年3月會喺灣仔會展搞大型慶祝酒會，呢個月就贊助無綫遊戲節目《決戰一分鐘》，送出最高100萬獎金畀成功完成十項挑戰嘅參賽單位，上網睇呢個節目嘅遊戲名包括「空中飛球」、「雙龍出海」、「手震腳震」、「當香蕉遇上橙」，想知道搞乜，惟有拭目以待。