【咖喱篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
相信曼聯今季帶俾球迷唔少興奮同刺激，仲high過坐過山車，因為佢哋有8場比賽都喺落後下反敗為勝，仲有兩場係先落後兩球㖭，真係心血少啲都嚇死！好多人都大讚尹佩斯同查維亞靴南迪斯把握力好，又讚費Sir換人調動勁，講到曼聯係逆轉王，但場場都反勝，係咪真係一件好事？反勝代表球隊先失波，8次反勝，咁即係8次先失波，對於一支班霸嚟講，成日先失波係霸氣嘅表現？我覺得係反映到防線好有問題，只係好好彩咁，強大嘅攻力掩蓋咗呢個問題。睇番啲賽後報道，費Sir都有提到防線唔掂，話隊波上半場唔集中，但好多時傳媒都會側重報道費Sir點讚入波球員嘅客氣話，所以普通球迷或者唔知費Sir踩過條後防好多次！不過，費Sir明知有問題，家都解決唔到，因為曼聯防線老化兼多傷兵，中場亦欠缺強力防中。自夏格維斯做咗玻璃人之後，曼聯都未出到一個頂級防中，費查都算ok，但又怪病纏身，今季打唔番水準，前幾季條後防仲可以，全因尼曼查維迪同里奧夠勁，有足夠體能上前殺波，做到少少防中工作，但今季一個傷一個老，防中就得個卡域克，有時仲連卡域克都冇，搵史高斯做防中，好難唔失波。想減少失波，一係打雙防中，但咁就會犧牲曼聯前場嘅華麗陣容，喺無奈之下，費Sir揀咗寧要進攻，不要防守。文:咖喱