警告:請以睇cult片mode收看以下節目「歡迎大家收睇ATV蕉點。今日嘅話題係,集會無罪、發牌無理。香港狼心阿X電視星期日喺政府總部外面集會,又唱歌又跳舞又呢樣又嗰樣,用娛賓方式向政府陳述濫發免費電視牌嘅弊處,用行動證明阿視係有諗頭、有創意。不過,一大批又暴力又粗口嘅破壞派人士,當日專登踩上門,先有香港禍害Miss Mo向住身形健碩嘅亞洲先生迎頭直衝。
網民改圖感痛心
喺集會過後,再有破壞派嘅網民浪費電力,喺Google不斷輸入『仆』字行頭嘅電影對白進行搜尋,令到每次有人輸入個仆字,建議搜尋欄就自然顯示嗰句由影帝張家輝所講,抹黑阿視說話『仆你個街亞視嚟㗎喂』唔單止咁,班網民仲不斷將抹黑本台嘅改圖四圍發放,例如用反動節目《頭條新聞》嘅截圖,恥笑呢個節目受過最大懲罰,就係安排喺我哋度播放,實在令人感到痛心。有呢班不事生產只係終日沉迷虛擬世界嘅年輕人,仲點樣同內地青年爭一日嘅長短?香港電視頻道嘅純潔和諧環境,又點樣保持落去呢?文化人胡恩威為咗說服一眾思想落後人士,噚日透過大氣電波曲線支持政府認真考慮增發牌照,點知引來冷嘲熱諷話佢縮沙。如果呢班人連曲線都睇唔明,咁香港仲有未來咩?」mailto:[email protected]