【牛腩篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
慶祝台慶足足幾個月嘅香港良心電視台，周日就喺門前搞集會，抗議港府計劃多發免費電視牌照，仲講如有更多電視台，會引發更多惡性競爭。競爭係良性定惡性，都係視乎你企邊個位睇，如果港府冇發有線電視牌，我敢人頭擔保，家香港人唔會一星期有10場英超、幾場西甲，仲有德甲、法甲、荷甲、NBA等等直播。香港只得兩個免費台都講競爭激烈，英超曾經有段時間，冠軍都係得曼聯同阿仙奴單打獨鬥，直至車路士9年前由俄羅斯油王阿巴莫域治入主，以高價收購球星策略，先打破曼聯阿仙奴「六四開」局面。俄羅斯資金入主，如果變咗港甲，老左或者會批評佢係外國勢力干預香港事務，不過英國作為自由經濟體，當然無任歡迎。車路士嘅金權陣容，歷來帶來無數話題；舒夫真高、費蘭度托利斯，先後打破英超最高身價前鋒紀錄，杜奧巴掀起非洲熱，摩連奴為首，連同卡維奴、保羅費拉拿、迪高等葡兵，令英超有更多不同元素。直至今季，由夏薩特、桑馬達及奧斯卡杜斯山度士組成的攻擊三核，又改寫了全能進攻中場定義。周日車路士被利物浦逼和，三核發揮沒有大問題，只是門前把握力差，未能拉開比分才被紅軍追和。夏薩特、桑馬達及奧斯卡基本上類型相似，突破力及速度都不錯。3人中最老也只是24歲的桑馬達，三核只要養成默契，不難成為無堅不摧的武器。文:牽牛