國福樓係近年冒起嘅富豪飯堂，上月中由尖沙嘴搬過海，喺灣仔皇悅酒店開業，總經理陳錦年（又名陳年）同好多富豪食客相熟，呢個月來除咗打點新舖，最忙就係要發短訊通知熟客，請佢哋去灣仔幫襯，大大話話發咗超過2000個短訊，可想而知年哥部手機幾重要。
通知搬舖轉地址
65歲嘅年哥喺福臨門做咗34年，識落大班富豪熟客，聽講話，馬時亨、錢果豐、金利豐（1031）老闆娘朱太等想食中菜，通常會搵年哥打點。年哥前年復出幫手喺尖沙嘴開國福樓，好多富豪都唔介意過海幫襯，但大部份富豪都住香港區，搬番過海比較着數。年哥做事以貼心見稱，所以搬舖咁大件事，除咗登廣告，都要用短訊通知熟客，仲要每個短訊寫好每個人嘅上款，有名有姓，至今發咗超過2000個短訊通知熟客轉地址，真係㩒到手指頭麻痹，抵佢間國福樓客似雲來。