兩位新導演梁樂民同陸劍青嘅電影《寒戰》上星期四喺香港開畫，成績非常好，截至前日上映四日已勁收1,261萬，淨係周六、日已經有成800萬票房，唔怪得有圈內人預計套片會收5,000萬。電影喺內地同樣上咗四日收9,800萬人民幣。不過前日喺網上發現已經有《寒》片嘅國語版可以下載，強國翻版真係防不勝防。
有圈中人睇完《寒戰》都讚，台灣導演九把刀喺網上讚劇情緊湊，特別係梁家輝去ICAC接受調查嗰幕，連周潤發都捧咗場話拍得「好有西片feel」。
城城同神秘人周旋
主角之一嘅郭富城對於有咁好成績同俾人讚，佢回應話：「好開心睇到觀眾有入返戲院睇戲嘅意慾，當然係台前幕後努力嘅成果。」兩位導演亦隨之而聲價十倍，叠埋心水準備開續集，故事集中交代做咗警務處處長嘅郭富城，點樣同神通廣大嘅神秘人周旋，古仔家仲度緊，幕後大黑手喺呢集根本未出場，續集會搵一位大明星壓場，仍然未決定，但開拍呢套戲之前，兩位導演會先同寰亞開另一套警匪片。