由明年初開始，港交所（388）會加強收緊對股價敏感消息的披露，例如管理層間唔中去投資者會議，update吓業務情況、講同店銷售數據；在新例下，呢啲數仲講唔講得？有可能要將成份speech upload上港交所先拆得掂。有上市公司CFO話，將來可以透露的數據肯定會越來越少，唔通佢得閒為每一個投資者con call的內容出通告咩？但如果為咗保障投資者可公平獲取資訊，麻煩啲，都值得嘅。可能近年半新股太多，唔少家族企業一夜間變成上市公司，對條例唔熟，出事情況亦激增。曾經有老闆就擅自利用上市公司的資金周轉，無作出披露，到auditor期末check數前幾日，先滙返筆錢入去；亦有知名零售企業，老闆一直謀算在上市公司搞自己嘅私人投資，最後在其他董事會成員力勸下，先肯另起爐灶。家族企業老闆，成日覺得上市公司仲係屬於自己，導致企業管治水平低落。而一個好嘅CFO，有時就係要扮吓「醜人」，提醒老闆，如果唔跟足compliance會有幾大鑊，太好人，是做不好你份工的。有好多基金，肯買家族式的上市企業，唔係信個老闆，係信個CFO。這解釋了為何CFO一走，公司股價總是一去無回頭。海迪