【北京】楊穎（Angelababy）同男友黃曉明經常會爭取機會拍拖，早排Baby套新戲《太極2》喺北京首映，佢嗰晚忙到11點先收工，之後換上成身黑衫，飛車去南二環路會曉明，曉明嗰晚又以全黑衫現身，佢哋入咗一間叫「麻記烤串」嘅小店同朋友嘆串燒。
間食店面積好細，裝修有啲簡陋，但曉明同Baby完全唔介意環境唔夠浪漫，仲食得鬼咁滋味，Baby食到個嘴好多油，仲不時含情脈脈望住男友。佢哋成餐飯係咁玩眉目傳情，仲不時咬耳仔笑瞇瞇，其他朋友好似變咗搭枱。
食飽後曉明孖Baby同車走人，不過佢哋唔係返曉明嘅「黃府」，而係齊齊去咗Baby下榻嘅萬麗酒店，先落車嘅Baby行到酒店門口回眸一笑，被電暈嘅曉明即刻追上去，兩人之後就喺酒店享受一夜浪漫。
今日係曉明35歲生日，問曉明經理人Baby嗰晚係咪同曉明食串燒預祝？曉明經理人話唔清楚，又話只知曉明今日會喺北京，可能會同朋友食飯慶祝。
撰文：丁寧
