貴價茶餐廳翠華（1314）周三公開招股，翻閱翠華初步招股書，發現五位創辦人好學之餘，對太太亦有情有義，五位老闆各自同太太一齊揸住翠華股份，仲走去揀個「一生一世」嘅股份編號。可惜唔係所有股東都想同隻股一生一世，最好隻股一掛牌就爆升幾成或幾倍，「一日情」就賺錢走人。之所以話翠華五位老闆好學，皆因五位老闆年齡介乎49至61歲，又喺飲食業做咗幾十年，但早幾年全部走去進修，攞番幾張「沙紙」。
89年起家 老婆有份持股
最大股東兼主席李遠康同執董何庭枝一齊喺2010年底攞咗中山大學工商管理碩士學位，三位執董張汝桃、張汝彪兩兄弟同張偉強，04年底齊齊修畢香港公開大學基礎食物衞生經理課程。查實佢哋89年就夾份買起新蒲崗翠華，開始做老闆，咁有經驗都願意走去上堂，真係好少老闆做得到喎！上市後，五位一齊揸住翠華合共七成股權，睇真啲，五位各自同太太揸住自己嗰份股份，雖然唔知真心還是被迫，但都算係咁。五位老闆亦拉攏到不少業內精英幫手，曾經人氣嘅卡啦OK加州紅老闆駱國安2010年賣盤後，就做咗翠華行政總裁，總經理李楸夏亦都係來自加州紅。今年中先做翠華財務總監嘅楊東之前喺煌府婚宴專門店睇數，翠華呢個班底可算係集大成，能否幫到股價就遲啲先知喇！李華華mailto:[email protected]
