最「好睇」：阿仙奴
阿仙奴被英國網站soccernet評為最令人困惑嘅國內球隊，可想而知隊波幾難捉，欣賞角度真係唔會令你失望，講賭波就怕晒；莫怪阿迪達射12碼宴客，他不是罪人，沒有停賽嘅韋舒亞，佢年逾30歲，8天踢足3場硬仗有助攻又要回後補近期左閘大缺口。雲格原希望長線韋仔復出，同阿迪達輪流踢。其實富咸今屆好sharp醒，主場攻得，作客都肯同阿奴鬥攻，拜仁雷斯已勝任離隊投熱刺嘅迪比利當中場樞紐，貝碧則優化了以前森莫亞同安祖莊臣沒法提供嘅射術，下周日返主場鬥新特蘭，必更強！
最有耐性：雷丁
上周六英超係陰謀論、捉路賭波者嘅黑日子，睇form躉嘅勝利日；近績好嘅球隊繼續贏，所以小弟拗頸，雷丁繼續不贏，上盤平/半輸半格，算執番身彩。雷丁硬淨不輸，但冇夠份量嘅中場playmaker，連鬥諾域治前線攻力都咁疲弱，哭!西布朗贏韋根，計排名、計今屆最令人驚奇呢兩瓣，已經打沉迷信莊家開得咁熱必有蠱惑嘅陰謀論。
最神經：山度士
賽前講過，下周中打無謂國際賽，球星們可以喺今周聯賽放盡踢，處處見大波膽，呢類戰情其實一季唔常見幾次；荷甲同巴甲3場波全開入球大，不過有隊波喺收爐前冇分頭咪亂捧，講緊係巴甲明星波山度士，排中游唔知係咪等收爐？班波好爛路，上次作客有尼馬中三元作客贏高士路4球；今次再作客包尾嘅戈亞尼恩斯，竟然喺半場領先嘅情況下，反輸1:2；尼馬踢足全場僅5次射門2中目標；還剩3場聯賽，等唞暑、搵路數跳糟好過！
最感慨：樸茨茅夫
連同度風雨多時嘅領隊艾比頓都過檔黑池，現由看守領隊，90年維拉、錫周三中場好手韋定咸撐住；樸茨茅夫剛作客英甲弱旅貝利淨吞兩蛋，呢班冇錢雜牌軍輾轉已淪落至尾7，來屆再降機會唔細，以後都可能「免睇」，因為足智彩未有英乙賭。蘋果波神