曼城前鋒巴洛迪利叫得做巴神，就梗係普通人諗唔到或做唔到嘅嘢，佢都做得到，噚日連後備都冇嘅佢，喺上周五揸車到球場練波時，就將架價值16萬鎊（約196萬港元）嘅賓利跑車，噴成迷彩顏色。
赫特睇到眼凸
係人都知，軍人打仗時着上迷彩服，主要係想將自己融入周圍環境，等敵軍唔容易發現，可以令襲擊更加得心應手；不過，巴神如果係因為想玩低調而將架跑車噴成迷彩，咁就效果剛好相反嘞，因為喺英格蘭大街大巷，人人見到顏色咁古靈精怪嘅車，都自然望多兩眼啦，佢想引人注意就真！因為佢另外擁有嘅純白色瑪莎拉蒂、啞黑色嘅Audi R8，以及鮮紅色嘅法拉利咁，架架搶眼。
據一名當巴神揸車到達練習場時啱啱在場嘅曼城球迷講：「喺巴神泊車時，曼城門將赫特亦在場，佢見到巴神架車，睇到眼都凸埋，仲好似忍笑忍得好辛苦咁呀！」巴神呢啲當打球星，腰纏萬貫，當然鍾意將愛車點玩都得啦！
沙維治揸300鎊車宣傳
不過，我求大俠就奉勸呢啲球星要未雨綢繆，唔好好似前威爾斯球星沙維治咁，衰到要揸有10年車齡、價值得300鎊嘅二手現代轎車喇。
雖然沙維治揸殘車呢單嘢，不過係博彩公司嘅宣傳技倆，但好多球迷都覺得如果佢喺現實生活係咁，就真係抵死喇！因為沙維治喺球員時代不知幾咁浮誇，又愛揸名車，就算效力弱隊好似打比郡咁，都依然當正自己係球星，搞到好多人都唔妥佢囉！
至於巴神嘅契爺，即係曼城領隊文仙尼，就唔鍾意揸車，反而愛踩單車，而可能受日前發生奧運單車冠軍韋堅斯踩車時被車撞嘅新聞影響，文帥踩車返曼城時，不知幾小心，一於慢慢嚟，小心踩得萬年車咁話。