政府堅決落實「屠龍」大計，毀滅龍尾天然泥灘嘅行動如箭在弦。同星唔同命，年薪374萬元嘅環境局局長黃錦星自然比住喺爛泥上面嘅海星矜貴得多。屠龍星噚日又出嚟重申要人工灘、唔要自然美嘅立場，話政府已經同環保團體溝通咗，政府嘅睇法係暫時冇任何改變。
屠龍工程嘅理由係，大埔居民需要一個泳灘。其實呢個謊言一早已經被識破，事關烏溪沙都有不知幾水清沙幼嘅泳灘。
退一萬步講，若然要做到區區有泳灘，咁吳爽都建議政府最少起多三個人工泳灘，唔好歧視呢幾區嘅居民先得㗎。吳爽
中區：高官門常開潛水
雖然港島區已經有好多泳灘，但係全部集中喺南區，維港都好應該整番個人工泳灘。facebook已經有人設立咗一個「強烈要求政府在添馬政總門外興建人工沙灘」嘅群組，發起人話：「既然我們的政府都不希望跟我們講常識，我們何不採用政府的反智邏輯，強烈要求在政府總部也建設一個人工沙灘。」係喎，咁樣唔得掂嘅高官潛水都放便啲。
啟德：排洪渠變身泳灘
全長2.4公里嘅啟德明渠，係東九龍嘅排洪渠道。明渠本來好污糟，但喺渠務署嘅努力之下，水質已經逐步改善。雖然都未去到適宜游水嘅程度，但既然政府認為龍尾水質咁惡劣都可以畀人游水，咁啟德明渠都未嘗不可鋪沙扮泳灘。更重要係，民政事務局局長曾德成都公開撐屠龍，咁佢好應該將人工泳灘加入啟德體育城計劃裏面。
將軍澳：心曠神怡砌誠堡
鄰近西貢嘅將軍澳，人口喺六年之後會升破50萬大關，單靠西貢嘅泳灘已經唔能夠滿足當區需要。當年將軍澳發展工業邨嘅時候，鏟咗大赤沙、小赤沙。大埔鄉紳以回復龍尾「原貌」為理由建造人工沙灘，咁位處小赤沙原址嘅日出康城，都應該還大自然一個公道，喺嗰度重建泳灘。誠哥都話日出康城心曠神怡，起埋泳灘一定令區內樓價再創新高。
