港股正值調整途中，上周五未見起色又未見技術超賣，惟有等機會，或者可以逢低分段吸納優質股。中銀國際唱好合和實業（054），話佢主要持有收租物業，唔怕SSD。合和升咗唔少，要搵未升而資產組合類似嘅同類概念股，有細細隻嘅民生國際（938）。之前民生同張化橋搞民間借貸業務，最後喺4月胎死腹中，張化橋雖然辭任CEO，都喺微博讚民生係管理嚴謹、營運健康嘅公司。睇嚟民生只係覺得民間借貸業務風險大，所以打退堂鼓，夠晒穩陣。之後民生公佈全年業績，宣佈派發特別息每股兩毫子。公司取消新搞作，有錢剩就派息回饋股東，抵讚。佢上年度每股盈利4.51仙，唔計特別息都派息5仙，股息率12.7厘；派完息後，淨現金應該仲超過1億元。
業務穩陣兼派高息
講番佢同合和相似嘅地方，就係持有唔少中港收租物業，另外仲有穩定嘅業務支持。民生從事物業同珠寶加工業務，投資物業方面，單計尖沙嘴鐵路大廈19樓全層，以年初低層成交價超過8000萬元計算，家起碼值1億元，加埋內地物業舊年收租3740萬元，當拆做REITs計，5厘回報都隨時值7億元。之後仲有華東國際珠寶城一期商住部份落成，可以增加租金收入；另外，公司亦有待售竣工物業2.63億元。未計上市公司殼價同其他業務，淨係物業加淨現金，點都高過公司嘅5億元市值多多聲。至於珠寶加工業務，基本上係自動波每年賺毛利1億元，即使金融海嘯期嘅09年度業績，珠寶加工毛利都有1.03億元，但之後最高都只係全年1.15億元，唔叻但非常穩定，佔整體毛利大約三分之二。民生舊年純利5602萬，市盈率8.8倍，市賬率唔夠0.4倍，以佢嘅業務如此穩陣，擁有唔少資產，市值得5億元，估值確實平得誇張。呢隻股成交相當淡靜，但經過收集後，通常都爆上一兩棍，睇圖家差唔多要突破0.40元阻力，小注買入持有，可上望0.60元。晉佳本欄逢周一、三及五刊出